မမသည် ငွေ့ရည်ဖွဲ့စ တိမ်ဖြူမွကလေးဖြစ်၏

၁။

ထို့နေ့က ကြွေကျခဲ့သော သစ်ရွက်ကလေးမှ ရွက်ကြောတို့ကို တစ်နေကုန် ထိုင်၍ ရေတွက်ခဲ့သည်မှာ အကြိမ်ပေါင်းမည်မျှရှိပြီမသိ..။ တကယ်ဆိုလျှင် နေ့ရက်၊ အချိန်အခါ၊ နေရာ၊ အဆောက်အဦ၊ အရာဝတ္ထုများသည် အမှတ်တရတို့ သိုလှောင်သိမ်းဆည်းထားနိုင်စွမ်းမရှိကြောင်း ကျွန်တော် သိရှိခဲ့သည်မှာ ကြာခဲ့ပါပြီ..။ မမဖြင့် သိလိမ့်မည်မထင်ပါ..။ မမသည် ကျွန်တော့်ဝတ္ထုထဲမှ ဇာတ်ကောင်တစ်ဦးသာလျှင်ဖြစ်၏။ ကျွန်တော့်ဝတ္ထုထဲတွင် မမသည် စရိုက်သေ..။ ကျွန်တော့်ဝတ္ထုထဲတွင် မမသည် တန်ဆေး၊ လွန်ဘေး..။ ကျွန်တော့်ဝတ္ထုထဲတွင် မမသည် ပြန်ရောက်မလာတဲ့ ဘူတာကလေး..။ အတိတ်ကိုဆောင်သော်..၊ မမသည် ကျွန်တော့်ဝတ္ထုထဲတွင် တစ်ခွန်းတည်းသော စကားကိုသာလျှင် ပြောရပေလိမ့်မည်..။ ဤသည်မှာ စကားကုန်အောင် ကြို၍ အသိပေးထားခြင်းပင်ဖြစ်၏။

၂။ 

You're a loaded gun

                       Bon Jovi

၃။

ကြုံခဲ့ရဖူးသော ပူဆွေးသောက ဗျာပါဒတို့အား တဖန်ပြန်၍ လွမ်းမောတမ်းတလာချိန်သည် မက်မောခဲ့ရဖူးသော ပျော်ရွှင်ဖွယ်ရာများ၏ ခြောက်လှန့်စိုးမိုးခြင်းကို အလူးအလိမ့် ခံစားရချိန်ပင်ဖြစ်၏။ တစ်ခါတုန်းက ဒုက္ခတို့သည် အပျော်အရွှင်များဖြစ်လာ၍ တစ်ချိန်တုန်းဆီက ကြည်နူးစရာတို့ကား ၀မ်းနည်းဆွတ်ပျံ့ဖွယ်ရာများ ဖြစ်လာလေသည်။ လောကသည် ထိုသို့ပင် ဆန်းကြယ်လွန်းလေ၏။ ဘ၀သည် နာကျင်ဖွယ်များစွာဖြင့် မိမိအား ကြင်နာတတ်ကြောင်း ပြသပေလိမ့်ဦးမည်..။

၎။

ကြည်ပြာရောင်မနက်ခင်းများအကြောင်း တွေးမိတော့

မင့်စိတ်နဲ့ သေရပြီး

ငါ့ခန္ဓာနဲ့ ငရဲခံရတယ်

ကိုယ့်လားရာဂတိဟာ

အဲဒီ ၀ပ်ကျင်းကလေးဆီမှာ..။

၅။

သံသရာကို ဘယ်လိုအမည်ပဲ ပေးပေး တကယ်တမ်း ဝေးကြရတဲ့အခါ တစ်ပတ်ပြန်လည်မလာမှာကို ကြောက်နေမိသူတစ်ယောက်ရှိတဲ့အကြောင်း သိစေချင်ရုံပါ..။ နှလုံးသွင်းချင်း မတူညီလို့ လွဲခဲ့ရတဲ့ ဘ၀တွေ..၊ ကမ္ဘာကြီးပေါ်ကျတဲ့ မိုးစက်တို့ထက် ပိုများတယ်ဆိုတာကလေး သိစေချင်ရုံပါ..။ အဲဒီမီးဟာ လောင်ကျွမ်းစေသူရော၊ လောင်ကျွမ်းခံရသူကိုပါ မြှိုက်တယ်ဆိုတာ သိစေချင်ရုံပါ..။ ဟိုးတုန်းက ကလင် ကလင် မြည်တတ်တဲ့ ဘဲလ်ကလေးပါတဲ့ စက်ဘီးကလေးတစ်စီး ရှိခဲ့ဖူးတယ်ဆိုတာ သိစေချင်ရုံပါ..။ ဒါပေမဲ့..၊ အဲဒီစက်ဘီးကလေးရဲ့ ကယ်ရီယာခုံလေးအကြောင်းကိုတော့ ပြောပြခဲ့ဖူးရင်လည်း မေ့သာပစ်လိုက်ပါ..။ ချိန်းကြိုးကလေးတွေဟာ နှစ်ဦးသားအတူ အဝေးကိုမှ မသယ်ဆောင်နိုင်ခဲ့တာ..။

၆။

 

အိပ်မက်တွေကို မုန်းတယ်

နိုးလာတဲ့ အခါ

ငါ့မှာ

နှစ်ခါ ပြန်နာကျင်ရတယ်..။

၇။

လေထုထဲက မမအသံရုပ်ကလေးတွေကို မြင်နေရတုန်းပင်ဖြစ်၏။ ရနံ့တွေမှာ မမ ပုံရိပ်တို့ ပါဝင်နေဆဲပင်ဖြစ်၏။ စကားလုံးတွေမှာ မမ အမူအရာတို့ ကြားယောင်နေရမြဲပင်ဖြစ်၏။ ချစ်ခြင်းဟာ Overload ဖြစ်တတ်ပါသလား..။ တစ်ရှူးစက္ကူကလေးများဖြင့် ထုပ်ပိုးသိမ်းဆည်းထားခဲ့သော မမ နှုတ်ခမ်းရာကလေးတွေနှင့် ချိတ်ဆက် နားဆင်ဖို့အတွက် ကျွန်တော့်နှလုံးသားကို အားအပြည့်သွင်းထားလျက်ပင်ဖြစ်၏။

၈။

Will I wait a lonely lifetime

If you want me to- I will

                         The Beatles

၉။

 

အတူထိုင်ခဲ့ဖူးသော တစ်ပါးသူတို့၏ ကော်ဖီဆိုင်ကလေးအား ထိုသူတို့ပင် ဖြိုဖျက်နေသည်ကို လိုင်းကားပေါ်မှတဆင့် မမြင်ရခင်ကတည်းကပင် အတူတကွတည်ဆောက်ခဲ့ဖူးသော တစ်စုံတစ်ရာသောအဆောက်အအုံကလေးအား မမ ဖြိုချရစ်ခဲ့သည်မို့ ထူးပြီးလည်း မနာကျင်လိုတော့ပါ..။ အမှတ်ရစရာတို့သည် အဆောက်အဦ၌ မတည်ကြောင်း ကျွန်တော် ဆိုခဲ့ဖူးပါပြီ..။ လွှတ်ခဲ့ဖူးသော စက္ကူလေယာဉ်တို့ ဟိုး..အဝေး ပျံသန်းသွားချိန်၌ အချိန်ကိုက် တိုက်ခတ်လာခဲ့သော လေပြင်းမုန်တိုင်းမှာ ထိုးဇာတ်သာလျှင်ဖြစ်၏။ ဝေ့၀ဲမိသော မျက်ရည်စတို့မှာမူ အစစ်ဖြစ်လေသည်။ ရထားသည် ပုံမှန်ဆိုက်သော်လည်း ဘူတာရုံကလေးမှာ စွန့်ခွာနှင့်လေပြီ။

၁၀။

ထိုနေ့က ကြွေကျခဲ့သောသစ်ရွက်ကလေးမှ ရွက်ကြောတို့သည် "ပြန်မလာဘူး" ဟူသော အနက်ကို ဆောင်၏။ နောက်ထပ်.. နောက်ထပ် တစ်ရွက်ပြီး တစ်ရွက်..။ သစ်ရိပ်အောက်၌ ထိုင်နေရင်း ထိုသစ်ပင်အား မုန်းတီးနေမိခြင်းသည်

ကျေးဇူးမဲ့ရာ ရောက်သည်ဆိုပါလျှင် ငါ၏ ကန္တာရ၌ မည်သည့်အပင်မှ မပေါက်စေသတည်းဟု သင်တို့အား ကျိန်ဆိုခွင့်ကို ပေးပါမည်။ ဆက်လက်၍ ကြွေခဲ့လျှင်မူ မုန်းတီးသူ ငါ၏ အပြစ်မဟုတ်ချေ..။

၁၁။

You promise me heaven

Then put me through hell

Chains of love got a hold on me

When passion's a prison

You can't break free

……………………………

You're loaded gun

……………………………

There's nowhere to run

No one can save me

The damage is done

              Bon Jovi

၁၂။

ယုန်တွင်းထဲသို့ လိမ့်ကျခဲ့သော အဲလစ်ကဲ့သို့ အပြင်ကမ္ဘာသို့ ပြန်လာနိုင်ခွင့်ကလေး မမ ပေးမသွားခဲ့ပါ..။ ကိုမာ ၀င်ခဲ့သော နှလုံးသားကို နမ်းရှိုက်နိုးယူဖို့ မမ မကြံစည်ခဲ့ပါ..။ ပန်းမ၀င်ခင် တိမ်းမှောက်ခဲ့ရသော ကားအိုကြီးကို တွန်းယူ ပြီးဆုံးစေခဲ့သော ပြိုင်ကားကလေးကဲ့သို့ ကျွန်တော်၏ မျှော်လင့်ချက်တို့ ဂုဏ်သရေရှိစွာ ရှုံးနိမ့်စေဖို့ မမ မပြုမူခဲ့ပါ..။ မမသည် ကျွန်တော့်ဝတ္ထုမှ ဇာတ်ဆောင်တစ်ဦးသာလျှင်ဖြစ်၏။ မမသည် ကျွန်တော့်ဝတ္ထုထဲ၌ စရိုက်သေပင်ဖြစ်သည်။ ကျွန်တော့်ဝတ္ထုထဲ၌ မမ၏ ဆံပင်ဂုတ်ဝဲကလေးမှာ ဘယ်တော့မှ ရှည်မလာတော့..။ ကုန်ကုန်ပြောရလျှင်.. ကျွန်တော့်ဝတ္ထုထဲ၌ မမသည် တစ်ခွန်းတည်းသော စကားကိုသာ ပြောဆိုရပေမည်..။ ထိုသို့အားဖြင့် အတိတ်ကိုဆောင်သော်..၊ ကျွန်တော့်ဝတ္ထုထဲ၌ ချက်ဖ်ကော့သည် မမ အား သေနတ်ပစ်နည်း သင်ကြားပေးခဲ့လေ၏..။ မမသည် ချက်ကော့ဖ်၏ သေနတ်ဖြင့် ကျွန်တော့်အား အသေပစ်သတ်ခဲ့လေသည်။

၁၃။

အဲဒီလိုပါပဲ ကောင်မလေးရယ်

မိုး  တွေ  က  တိတ်  တာ  တောင်  ကိုယ်  က  ရွာ  တုန်း  ..

                                     တာရာမင်းဝေ

နွေရိပ်

၂၂၊ ဇူလိုင်၊ နှစ်ထောင့်ဆယ့်ငါး